ஒரு வீட்டை நடாத்தும் பெண்ணே நாட்டை நடாத்தும் பொறுப்பானவள்

 சர்வதேச மகளிர் தினம் இன்று. இந்த ஆண்டுக்கான கரு '"சமத்துவத்தினை தழுவிக்கொள்ளுதல்" அந்த வாக்கியத்தின் நேரடி அர்த்தத்தில், உலகம் ஒரு சமத்துவமான இடமாக இருந்தால், பெண்ணும் அவளுடைய உலகமும் சமத்துவமாக இருக்க வேண்டும். உலகில் குழந்தைகளைப் பெற்றெடுக்கும் தாய் ஒரு பெண். ஒரு குடும்பத்தின் மகிழ்ச்சி, ஆறுதல், ஆரோக்கியம், வளர்சி மற்றும் ஊட்டச்சத்து மற்றும் குழந்தைகளின் எதிர்காலத்தைப் பாது காக்கும் அடித்தளத்தை அமைக்கும் முன்னோடி அம்மா. கணவன், பிள்ளைகள் மற்றும் உறவினர்களின் அனைத்து கடமைகளையும் நிறைவேற்றும் பொறுப்புவாய்ந்தவள் ஒரு தாய், இவர்கள் குடும்பத்தின் பொருளாதாரத்திற்கு நேரடியாகவும் மறைமுகமாகவும் பங்களிக்கிறார். ஆரோக்கியமான மனம் மற்றும் வலிமையான தாயைக் கொண்ட குடும்பம் இயற்கையாகவே வலிமையானது. ஆரோக்கியமான மற்றும் வலுவான குடும்பங்களைக் கொண்ட ஒரு நாடு இயற்கையாகவே ஆரோக்கியமான மற்றும் வலுவான நாடாக மாறும்.

சுகாதாரம், கல்வி மற்றும் நாட்டு மக்களின் அறிவுத்திறன் ஆகியவை ஒரு நாட்டின் வளர்ச்சியில் முதன்மையான அளவுகோல்களாகும். இந்த எல்லா காரணிகளையும் வெற்றிகரமாக அடைய ஒவ்வொரு குடும்பத்திற்கும் அம்மாதான் அடித்தளம் அமைக்கிறார். ஒரு பெண்ணின் உலகம் அவளின் வெளிப்புற அழகால் மட்டுமல்ல, அவள் பொருளாதாரம், கல்வி, சமூகம் மற்றும் ஆரோக்கியத்துடன் வலுவூட்டப்பட்டால் கூட அழகாக இருக்கும். 

உலகில் உயர்ந்த பொருளாதார மற்றும் சமூக வளர்ச்சியைக் கொண்ட நாடுகளில், பெண்கள் தங்கள் அடிப்படை உரிமைகளை ஆண்களுடன் சமமாக வென்றெடுக்கவும், அவர்கள் விரும்பிய வேலையில் சுதந்திரமாக ஈடுபடுவதன் மூலம் தங்கள் குடும்பத்திற்கும் சமூகத்திற்கும் தங்கள் கடமைகளை நிறைவேற்றுவதற்கும் வாய்ப்பு உள்ளது. நம்மைப் போன்ற வளர்ச்சியை நோக்கி நகரும் நாடுகளில், வார்ந்த நாடுகளின் பெண்களின் நிலையை விட இங்குள்ள பெண்கள் இன்னும் பின்தங்கியே உள்ளனர். ஒரு நாட்டின் வளர்ச்சி பரிபூரணமாக அமைய வேண்டுமானால், அந்நாட்டில் உள்ள அனைத்து ஆண், பெண், குழந்தைகள், விலங்குகள் என அனைத்து உரிமைகளையும் சுதந்திரங்களையும் அனுபவிக்கும் வாய்ப்பு உருவாக வேண்டும்.

இன்று இலங்கையில் வாழ்வதற்று மிகவும் கடினமான பிரதேசங்களில் உலர் அல்லது வரண்ட வலயமும் ஒன்று. இப்பகுதிகளில் ஏழை விவசாயிகள் அதிகம் வசிக்கின்றனர். இவர்களின் முக்கிய வாழ்வாதாரம் விவசாயம். அவர்கள் எதிர்கொள்ளும் முக்கிய பிரச்சனைகளில் ஒன்று விவசாயத்திற்கு தேவையான தண்ணீர் அவ்வப்போது கிடைக்காதது. அந்த மாகாணங்களில் உள்ள மக்களுக்கு விவசாயத்திற்கு தேவையான நீரை வழங்குவதுடன் சுத்தமான குடிநீரை வழங்குவதும் வறண்ட பிரதேசத்தை பாதிக்கும் பாரிய பிரச்சினையாக இனங்காணப்பட்டுள்ளது. இந்த மாகாணங்களுக்கு தேவையான நீர் வசதிகளை வழங்குவதன் மூலம் மக்களின் வாழ்வாதாரத்தை ஊக்குவிப்பதற்காக விசேட திட்டங்களை நடைமுறைப்படுத்துவதற்கும், பெண்களுக்கு வலுவூட்டல் மற்றும் குடும்பங்களை வலுவூட்டுவதன் மூலம் முழு பிராந்தியத்தையும் அபிவிருத்தி செய்வதற்கு அவர்களின் பங்களிப்பை வழங்குவதற்கு தலைவர்கள் முன்வரவேண்டும்.

அதற்கு அப்பால், பெண்களுக்கு அதிகாரம் அளிப்பது என்பது கல்வி, சமூகம் மற்றும் பொருளாதார ரீதியில் அவளை மேம்படுத்துவதாகும். ஒவ்வொரு பெண்ணும் ஆரோக்கியமான வாழ்க்கையை எவ்வாறு நடத்துவது என்பதை நன்கு அறிந்திருப்பது மிகவும் அவசியம். ஏனென்றால் ஆரோக்கியமான பெண்ணே ஆரோக்கியமான தேசத்தின் அடித்தளம். பெண் குழந்தைகளின் ஆரோக்கியத்தில் குழந்தை பருவத்திலிருந்தே தாய் அக்கறை காட்ட வேண்டும். ஏனென்றால், எதிர்காலத்தில் அவளும் ஒரு தாயாகிவிடுவாள். ஆரோக்கியமான குழந்தைகள் பிறக்க, தாய் ஆரோக்கியமாக இருக்க வேண்டும். குழந்தைகள், கணவர் மற்றும் பிற குடும்ப உறுப்பினர்களின் ஆரோக்கியத்திற்கான பொறுப்பு அந்தக் குடும்பத்தின் தாயைப் பொறுத்தது. தாய் அல்லது பெண் விழிப்புடன் இருந்தால், ஆரோக்கியமான மற்றும் அறிவார்ந்த சமுதாயத்தை உருவாக்குவது மிகவும் எளிதானது. 

மாற்றுத்திறனாளி பெண்கள் நலனுக்காக சிறப்பு திட்டம் செயல்படுத்தப்படவேண்டும். மாற்றுத்திறனாளி பெண்களின் பொருளாதார மேம்பாட்டிற்காக திறன்களை மேம்படுத்தி சுயதொழில் பயிற்சி அளிக்கும் திட்டம் தொடங்கப்படவேண்டும். நமது நாட்டின் பொறுப்பு வாய்ந்த துறைகள் வலது குறைந்த பெண்கள் மீது போதிய கவனம் செலுத்தவில்லை. இவ்வாறான பெண்களுக்குத் தேவையான மருத்துவச் சிகிச்சை மற்றும் சேவைகளை வலதுகுறைந்தோர் செயலகத்தின் ஊடாகப் பெற்றுக்கொள்ள சுகாதார அமைச்சுக்கு வழிகாட்ட தந்திரோபாயங்கள் வரையப்படவேண்டும். வேலைவாய்ப்பு அல்லது வாழ்க்கை நிலைமைகளை மேம்படுத்துவதற்கு தேவையான உபகரணங்கள் அல்லது வசதிகளை வழங்குவதற்கு மத்தியஸ்தர்களாக இருக்கவும் துறைசார்ந்தவர்களுக்கு தலைவர்கள் முன்வரவேண்டும்.

இன்று நம் நாடு எதிர்கொள்ளும் ஒரு பெரிய பிரச்சனை வேலைத்தளத்தில் பெண்களின் பற்றாக்குறை. பொருளாதார ரீதியாக எவ்வளவு சிரமப்பட்டாலும் குடும்பப் பொறுப்புகளையும் கடமைகளையும் புறக்கணித்து வேலை செய்யும் வாய்ப்பு பெண்களுக்குக் கிடைப்பதில்லை என்பதே இதற்குக் காரணம். பொருளாதாரத்தில் முன்னேறிய மற்றும் உயர்கல்வி பெற்ற பெண்கள் நாட்டின் தொழிலாளர் படையில் சேர்ந்திருந்தாலும், உயர்கல்வி இல்லாத பல ஏழைப் பெண்கள் இன்னும் வேலையின்றி வறுமையில் சிக்கித் தவிக்கின்றனர். குழந்தைகளைப் பராமரிக்க ஆள் இல்லாதது, பொதுப் போக்குவரத்துச் சேவைகளில் பெண்கள் எதிர்கொள்ளும் துன்புறுத்தல்கள், சம வாய்ப்புகள் மற்றும் சம ஊதிய இழப்பு, பாலியல் வன்மம்; மற்றும் பாதுகாப்பின்மை காரணமாக இழிவுபடுத்தும் நிலமைகள் ஆகியவை பெண்கள் வேலையில் இருந்து விலகி இருக்கக் காரணங்களாகக் கண்டறியப்பட்டுள்ளன. 

இன்று பெண்கள் தங்கள் வேலை, குடும்பப் பொறுப்பு, சமூகப் பொறுப்பை நிறைவேற்றுவதில் பல்வேறு பிரச்னைகளைச் சந்திக்க வேண்டியுள்ளது. அலுவலகத்திலோ சமூகத்திலோ பெண்கள் சந்திக்க வேண்டிய தொல்லைகள், இடையூறுகள், குடிகாரக் கணவரால் வீட்டில் ஏற்படும் தொல்லைகள் என இன்றைய பெண்கள் சந்திக்கும் பல பிரச்சனைகளை அடையாளம் கண்டுள்ளோம். பெண்கள் மற்றும் குழந்தைகள் எதிர்கொள்ளும் பிரச்சினைகளுக்கு தீர்வு காண்பது அமைச்சகத்திற்கு சொந்தமானது. அதற்காக அமைச்சின் கீழ் நிறுவப்பட்ட தேசிய மகளிர் குழு பெண்கள் தொடர்பான சட்டத்தை அமுல்படுத்த நடவடிக்கை எடுக்கவேண்டும். 

பெண்கள் மற்றும் சிறுவர் பணியகத்தில் முறைப்பாடு செய்வதன் மூலமும் இலங்கையில் உள்ள 43 பொலிஸ் நிலையங்களில் அமைந்துள்ள பொலிஸ் மகளிர் பிரிவுகளில் முறைப்பாடு செய்வதன் மூலமும் பெண்கள் சில உதவிகளைப் பெற முடியும். தற்போது பல நிறுவனங்களும் அமைப்புகளும் பெண்களுக்கு உதவ முன்வந்திருப்பது பெண்களின் வளர்ச்சிக்கு சாதகமான சூழ்நிலைதான்;.

பணிபுரியும் பெண்கள் எதிர்கொள்ளும் பொதுவான பிரச்சனைகளில் ஒன்று, அவர்கள் வேலை செய்யும் போது தங்கள் குழந்தைகளை கவனித்துக் கொள்ள ஆள் இல்லாமல் இருப்பது. இப்பிரச்சினைக்கு தீர்வு காணும் வகையில், அரச மற்றும் தனியார் துறைகளில் பணியிடங்களில் குழந்தை பராமரிப்பு நிலையங்களை உருவாக்க முன்மொழியப்பட்டு நடைமுறைப்படுத்தவேண்டும். அதன்படி, 250 அல்லது அதற்கு மேற்பட்ட பெண் பணியாளர்கள் பணியாற்றும் நிறுவனங்களில் குழந்தை பராமரிப்பு மையங்களை நிறுவ பட்ஜெட்டில் முன்மொழியப்படவேண்டும். பராமரிப்பு மையங்களை நிறுவி அவற்றைப் பராமரிக்க சிறப்பு ஊக்கத் திட்டங்களும் அரசாங்கத்தால் தொடங்கப்படவேண்டும். அதன்படி, பராமரிப்புக் கடன் நிவாரணத் திட்டத்தின் கீழ் கடன் வசதிகளை வழங்கவும் ஏற்பாடு செயது ஊக்குவிக்கலாம்;.

தொழில்துறை திறன் விருத்தி

அரச துறையில் மூன்று மாதங்கள் மகப்பேறு விடுப்பு எடுக்கும் பெண்மணிக்கு அதிகபட்சமாக மாதம் 30,000 ரூபாய்க்கு உட்பட்டு நிறுவன வரியில் இருந்தும்,  சம்பள செலவில் 50 வீதம் கழிப்பதும் பட்ஜெட்டில் பெண்களுக்கான முக்கியமான முன்மொழிவுகளாகக் கொண்டுவரலாம்.

பெண்களை பொருளாதார ரீதியில் வலுவூட்டுவதற்காக புதிய வேலைத்திட்டங்கள் கொண்டுவரப்பட்டு பெண்களை சிறிய மற்றும் நடுத்தர அளவிலான தொழில் முயற்சிகளுக்கு வழிநடத்த நடவடிக்கை எடுக்கப்படவேண்டும்;. கிராமப்புறப் பெண்கள் வெளியூர் வேலைக்குச் செல்வதால் ஏற்படும் சமூகப் பிரச்னைகளைக் குறைப்பது முக்கிய நோக்கங்களில் ஒன்றாக இருத்தல்வேண்டும். வேலைக்காக வாழும் சூழலை விட்டு வெளியேறாமல் கிராமத்தில் வாழும் போது கிராமத்தில் இருக்கும் வளங்களைப் பயன்படுத்தி செய்யக்கூடிய சுயதொழில்களுக்கு பெண்களை வழிநடத்தும் பணியை செய்யவேண்டும். பெண்களின் உற்பத்திப் பொருட்களுக்கு பொருத்தமான உள்நாட்டு மற்றும் வெளிநாட்டு சந்தை வாய்ப்புகளை கண்டறிய ஏற்றுமதி அபிவிருத்தி சபையின் ஊடாக தொடர்புகள்; கட்டமைக்கப்படவேண்டும்.

தற்போதைய வேலை சந்தையில் அதிக கிராக்கி உள்ள வேலைகளுக்கு எவ்வாறு விண்ணப்பிப்பது என்பது பல பெண்களுக்கு புரியவில்லை. அந்தப் பற்றாக்குறையைப் போக்க பெண்களுக்கான முக்கிய வேலைப் பயிற்சித் திட்டங்களைத் உடன் ஆரம்பிக்கவேண்டும்.. ஹவுஸ் கீப்பர்கள், செவிலியர்கள் மற்றும் தொழில்நுட்ப வல்லுநர்களுக்கு பல பயிற்சி வகுப்புகள் அறிமுகப்படுத்தப்படவேண்டும். அதுபோல  இந்தத் திட்டங்கள், முச்சக்கரவண்டி மற்றும் மோட்டார் சைக்கிள் பழுதுபார்க்கும் தொழில்நுட்பப் பயிற்சி போன்ற தேவையான பயிற்சிகளையும் கொடுக்கவேண்டும். பயிற்சியின் முடிவில், ஒரு பெண் தனது சொந்த கேரேஜ், உதிரி பாகங்கள் கடை அல்லது பணியிடத்தை தானாகவே முன்வந்து நடத்தலாம். பெண்களின் பாரம்பரிய வேலைகளான சமையல், அழகு, கைவினைப் பொருட்கள் போன்றவற்றுக்கு முன்னுரிமை அளிக்கும் புதிய துறைகளுக்கு இப்போது வேலை சந்தையில் பெரும் தேவை உள்ளது.