உலகம் கொந்தளிக்கும் வேளையில் இலங்கை தன்னை மீள்வடிவமைக்க வேண்டும்

 மத்திய கிழக்குப் போர், உக்ரைன்–ரஷ்யா மோதல் ஆகியவற்றால் எரிசக்தி, உணவு, வர்த்தகம் ஆகிய துறைகளில் உலகம் அதிர்வுறும் சூழலில், இலங்கை எதிர்கொள்ளும் சவால்களையும் வாய்ப்புகளையும் அபிவிருத்திப் பொருளியலாளர் என்ற வகையில்  இந்த நேர்காணலில் பகுப்பாய்வு செய்கின்றேன்.

உலகில் விரிந்துவரும் சூழ்நிலைகளை ஓர் அபிவிருத்திப் பொருளியலாளராக எவ்வாறு நோக்குகிறீர்கள்?

உலக வரலாறு மோதல்களால் நிறைந்தது. அதிகாரப் போட்டியே சர்வதேச ஒழுங்கின் வழமையாக இருந்து வந்துள்ளது. எந்த நேரத்திலும் மோதல் வெடிக்கலாம் என்ற எதிர்பார்ப்புடன் ஒவ்வொரு நாடும் செயற்படுவது இயல்பானது. மத்திய கிழக்கிலும் உக்ரைன்–ரஷ்யாவிலும் இன்று நடப்பவை இந்த மோதல் தன்மையைத் தெளிவாகக் காட்டுகின்றன.

அபிவிருத்திப் பொருளியல் நோக்கில், மோதல்கள் எப்போதும் முன்னேற்றத்துக்குத் தடையாகவே இருந்துள்ளன. அனைத்து மக்களின் நல்வாழ்வுக்காக உலகப் பொருளாதாரம் தன் முழு ஆற்றலை எட்டுவதையும் அவை தடுத்துள்ளன. இரண்டாம் உலகப் போருக்குப் பின்னர் உருவாக்கப்பட்ட கட்டமைப்புகள் போரைத் தடுக்கும் வலிமையுடன் இல்லை என்பதே இன்றைய யதார்த்தம்.

மத்திய கிழக்குப் போர் உலகுக்குத் தாங்க முடியாத விளைவுகளைக் கொண்டுவந்துள்ளது. எரிபொருள் விலை உயர்வு, கடற்போக்குவரத்துத் தடங்கல் ஆகியன அவற்றில் அடங்கும். உலகப் பாதுகாப்பே அச்சுறுத்தலுக்கு உள்ளாகியுள்ளது.

நீண்டகாலமாகத் தொடரும் உக்ரைன்–ரஷ்யா போர் உணவு நெருக்கடியைத் தூண்டும் அபாயம் கொண்டது. உலகச் சந்தைக்குத் தேவையான கோதுமைப் பொருட்களில் பெரும்பகுதியை வழங்குவது அந்த இரு நாடுகளே. தற்போதைய பெற்றோலிய நெருக்கடி உர உற்பத்தியையும் பாதிக்கும். இறுதியில் அது விவசாயத்துக்கு விழும் நேரடி அடியாகும்.

இருக்கும் ஏற்பாடுகள் மோதல்களைத் தடுக்கத் தவறியதால், புதிய பாதுகாப்புச் சமன்பாடுகள் உருவாகி வருவதையும் காண்கிறேன். சவுதி அரேபியா, துருக்கி, பாகிஸ்தான் ஆகியவற்றுடன் இணைந்து மெக்கா உடன்படிக்கையை ஏற்படுத்தியுள்ளது. அமெரிக்காவை மட்டுமே முழுமையாக நம்பியிருப்பது பிராந்தியப் பாதுகாப்புக்கு உகந்ததல்ல என்பதை இன்றைய நிலைமை நிரூபித்துள்ளது; அதனை அந்த நாடு உணர்ந்ததே இதற்குக் காரணம்.

இது இலங்கை போன்ற ஒரு நாட்டுக்கு எதைக் குறிக்கிறது?

இரு யானைகள் மோதும்போது புல்லே மிதிபடும் என்பார்கள். இலங்கை போன்ற சிறிய, நடுத்தர வலுவுள்ள நாடுகள் நிலைமையைக் கவனமாக வாசித்துத் தமது பாதுகாப்புக்கான உத்திகளை வகுக்க வேண்டும். இங்கு பாதுகாப்பு என்பது இராணுவப் பாதுகாப்பு மட்டுமல்ல. எரிசக்தி, உணவு, இலக்கமுறை (டிஜிட்டல்) உள்ளிட்ட பல துறைகளின் பாதுகாப்பையும் அது குறிக்கும்.

வெளிநாட்டுக் கொள்கையில் நடுநிலைமை அடிப்படையானது. ஆனால் அகராதிப் பொருளில் அதனைப் பின்பற்ற வேண்டும் என்பது இதன் பொருளல்ல. இன்றைய சூழலில் தேவைப்படுவது உத்தி சார்ந்த, இயங்குநிலை நடுநிலைமையே.

புதிய எரிசக்தித் திட்டங்களை முன்னெடுக்க இதுவே உரிய தருணம். இல்லாவிடில் மத்திய கிழக்கின் ஏற்ற இறக்கங்களுக்கு நாடு எளிதில் இலக்காகும். இலங்கையிடம் சூரிய சக்தி, காற்றுச் சக்தி ஆகியவற்றுக்கான உயர் ஆற்றல் உள்ளது. அதனை உடனடியாகப் பயன்படுத்த வேண்டும். புதைபடிவ எரிபொருளில் தங்கியிருக்காமல் மின்சார வாகனப் போக்குவரத்தையும் முன்னேற்ற வேண்டும். தற்போதைய மோதல்கள் கற்பித்த பெறுமதியான பாடம் இதுவே.

புவிசார் அரசியல் நோக்கிலும் இது இலங்கைக்குச் சோதனைக் காலம். உலகளாவிய நெருக்கடியின்போது யார் நண்பர், யார் எதிரி என்பதைத் தரப்புகள் சோதித்துப் பார்க்கும். அமெரிக்காவும் ஈரானும் இலங்கையின் வெளிநாட்டுக் கொள்கையைச் சோதிக்கின்றன. பொருளாதாரத் தொடர்புகள் காரணமாக, இலங்கையின் மீது செல்வாக்குச் செலுத்தும் வாய்ப்பு இந்த விடயத்தில் அமெரிக்காவுக்கே அதிகம். இலங்கைக் கடற்பரப்பில் தரித்து நிற்கும் சுமார் 20 ஈரானியக் கப்பல்கள் உதவி கோரியுள்ளதாகத் தெரிவிக்கப்படுகிறது. ஐ.நா. கடல்சார் சட்டங்கள் தொடர்பான சமவாயத்தின் (UNCLOS) கீழ் உதவும் கடப்பாடு இலங்கைக்கு ஏற்படலாம். ஆனால் நடைமுறையில் அமெரிக்கத் தடைகளை எதிர்கொள்ளும் ஆபத்தை இலங்கையால் ஏற்க முடியாது.

இலங்கை தனது பொருளாதாரத்தைப் பல்வகைப்படுத்த வேண்டும். இன்று இலங்கையின் ஏற்றுமதிகளில் 23 சதவிகிதம் அமெரிக்காவுக்கே செல்கிறது. ஒரே சந்தையில் அளவுக்கு மீறித் தங்கியிருப்பது எந்த நாட்டுக்கும் உகந்ததல்ல. இந்தியாவுடனும் ஆசியான் நாடுகளுடனும் வர்த்தகப் பேச்சுவார்த்தைகளுக்குத் தற்போதைய அரசாங்கம் முன்னுரிமை வழங்கவில்லை என்பது வருந்தத்தக்கது.

உலகின் மிகப்பெரிய சுதந்திர வர்த்தக வலயமான பிராந்திய விரிவான பொருளாதாரப் பங்காண்மையிலும் (RCEP) இலங்கை இணைய வேண்டும். சீனா, ஜப்பான், அவுஸ்திரேலியா உள்ளிட்ட 15 நாடுகளை அது உள்ளடக்கியுள்ளது. இணைந்தால், இலங்கைக்கு அது ஒரு வரப்பிரசாதமாகும். இன்றைய சூழலில் அதன் தேவை நன்கு உணரப்படுகிறது.

நீண்டகாலப் பொருளாதார உறுதிப்பாட்டை அடைய, ஏற்றுமதிகளை அதிகரிப்பதிலும் ஆடை, தேயிலை ஆகிய பாரம்பரியத் துறைகளுக்கு அப்பால் உற்பத்திகளைப் பல்வகைப்படுத்துவதிலும் இலங்கை அவசரமாகக் கவனம் செலுத்த வேண்டும். தொடர்ச்சியான வெளிநாட்டு நாணய வருவாய், ரூபாவை வெளிப்புற அதிர்ச்சிகளுக்கு எதிராகப் பலப்படுத்தவும் அவசரக் கடன்களில் தங்கியிருப்பதைக் குறைக்கவும் இன்றியமையாதது.

தகவல் தொழில்நுட்பம், தளவாடம் (லொஜிஸ்டிக்ஸ்), சுற்றுலா போன்ற உயர்பெறுமதிச் சேவை ஏற்றுமதிகளையும் பெறுமதி சேர்க்கப்பட்ட பொருட்களையும் விரிவுபடுத்துவது, செலுத்தல் மீதியில் (BoP) உள்ள நடைமுறைக் கணக்கு மீதியை நேரடியாக வலுப்படுத்தும். உறுதியான நடைமுறைக் கணக்கு மிகை, உலகளாவிய எரிசக்தி விலை உயர்வு, கடன் அழுத்தம், புவிசார் அரசியல் ஏற்ற இறக்கம் ஆகியவற்றுக்கு எதிரான இறுதிக் கவசமாக அமையும்.

இலங்கை புவிசார் முக்கியத்துவம் மிக்க நாடு. வெளிநாட்டுக் கொள்கையில் அது தன்னை எவ்வாறு நிலைநிறுத்த வேண்டும்?

முதலில் இலங்கை தனது புவியியலைச் சரியாக வாசிக்க வேண்டும். எந்த அரசாங்கமோ தலைவரோ இதனைச் செய்துள்ளார்களா என்பது சந்தேகமே. உலகப் பாதுகாப்பில் புவியியலே எல்லாவற்றையும்விட முக்கியம். இராணுவ வலிமை இருந்தும், ஹோர்முஸ் நீரிணையைக் கட்டுப்படுத்தும் ஈரானை அமெரிக்காவால் இன்று அடக்க முடியவில்லை. உலகின் எரிபொருள் போக்குவரத்துக்கான முக்கிய நெரிசல் புள்ளி அது. நாளொன்றுக்குச் சுமார் 18 மில்லியன் பீப்பாய்கள் அதன் வழியாகச் செல்கின்றன.

யெமனின் ஹூதி போராளிகள் செங்கடலில் கப்பல்கள் மீது நடத்தும் ஏவுகணைத் தாக்குதல்கள் சர்வதேசக் கப்பற்போக்குவரத்தைக் குழப்பியுள்ளன. ஆபிரிக்காவையும் அரேபியத் தீபகற்பத்தையும் இணைக்கும் இந்த முக்கிய நீர்வழியின் பாதுகாப்புச் சூழலையும் அவை மாற்றியுள்ளன.

இலங்கை, உலகின் மிகவும் பரபரப்பான கிழக்கு–மேற்குக் கடற்பாதைகளில் ஒன்றின் அருகில் அமைந்துள்ளது. கொள்கலன் போக்குவரத்தில் 60 சதவிகிதத்துக்கும் மேல் இந்தப் பாதையிலேயே நடைபெறுகிறது. இந்தியா, சீனா போன்ற முக்கிய சந்தைகளுக்கும், வியட்நாம், தாய்லாந்து, இந்தோனேசியா போன்ற ஆசியான் பிராந்தியத்தின் வளர்ந்துவரும் நாடுகளுக்கும் இலங்கை அண்மையில் உள்ளது. இந்த அமைவிடம் வழங்கும் பொருளாதாரப் பயன்களை இலங்கை உணர வேண்டும். அப்போது ஏனைய உலக நாடுகளுடன் தனது நலன்களுக்காகப் பேரம் பேசுவதற்கு அது சிறந்த நெம்புகோலாக அமையும்.

அண்மை, நாகரிக, கலாசாரத் தொடர்புகள் காரணமாக இந்தியா இலங்கைக்கு மிக முக்கியமான நாடு. இந்தியாவுடனான உறவுகளை உரிய முறையில் பேணிக்கொண்டே, ஏனைய நாடுகளுடனும் இலங்கை முன்னேற வேண்டும். வர்த்தக, பொருளாதாரத் துறைகளில் சீனா ஒரு சிறப்புப் பங்காளி. ரஷ்யாவுடனான பொருளாதாரக் கூட்டுறவின் முழு ஆற்றலும் இன்னும் உணரப்படவில்லை. ஆசியானுடன் நெருக்கத்தை அதிகரிக்க வேண்டும். அவுஸ்திரேலியா, தென்னாபிரிக்கா, கென்யா, துருக்கி போன்ற நடுத்தர வலுவுள்ள நாடுகளுடனும் உறவுகளை முன்னெடுக்க வேண்டும். அப்போது போட்டி நலன்களைக் கொண்ட பெரு வல்லரசுகளுடன் பேரம் பேசுவதற்கான இடைவெளி விரிவடையும்.

கடல்சார் நாடு என்ற வகையில், கடற்பாதைகளைப் பாதுகாக்கவும் அனர்த்தப் பதிலிறுப்புக்காகவும் இலங்கை தனது கடற்படை வலிமையை அதிகரிக்க வேண்டும். வான் கண்காணிப்புத் திறனுடன் கூடிய வலிமையான கடற்படை அமைந்தால், நடுநிலைமையைச் செயற்படுத்தும் ஆற்றல் நாட்டுக்குக் கிடைக்கும்.

இலங்கையால் தனது பொருளாதார அபிவிருத்தியின் முழு ஆற்றலை ஏன் எட்ட முடியவில்லை?

வெளிநாட்டு உறவுகளிலிருந்து அதிகபட்சப் பயனைப் பெறுவதற்கு, இலங்கை முதலில் உள்நாட்டில் தன்னைச் சீரமைக்க வேண்டும். சுதந்திரத்துக்குப் பின்னரான வரலாறு முழுவதும் கொள்கைத் தொடர்ச்சி இல்லாமையே இலங்கை ஓர் அபிவிருத்தி அடைந்த நாடாவதைத் தடுத்துள்ளது. சில சமயங்களில் கட்சிகளின் வெளிநாட்டுக் கொள்கைகள் துருவங்களாக மாறுபட்டிருந்தன. ஒரு அரசாங்கம் செய்தவற்றை அடுத்த அரசாங்கம் முற்றாகக் கலைத்துவிடுகிறது.

உள்நாட்டில் கட்சிகள் அரசியல் செய்யலாம். ஆனால் வெளிநாட்டுக் கொள்கை ஒன்றுக்கொன்று பெரிதும் வேறுபடக் கூடாது. ஏனெனில் வெளிநாட்டுக் கொள்கை இன்று பாரம்பரிய இராஜதந்திரம் மட்டுமல்ல. அது வர்த்தகம், முதலீடு, தொழில்நுட்பம், சுற்றுலா, எரிசக்தி, தளவாடம் ஆகியவற்றுடனும், இறுதியில் உலகளாவிய பெறுமதிச் சங்கிலிகளுக்கான அணுகலுடனும் பிணைந்தது.

மேலும், தனது பலங்களை இலங்கை இதுவரை இனங்காணத் தவறியுள்ளது. கடல்சார் மையம், சேவை மையம் என்ற வகையிலேயே அதன் முக்கியத்துவம் இன்றும் நிலைத்துள்ளது. இலங்கை கல்வியறிவுள்ள தொழிற்படையால் ஆசீர்வதிக்கப்பட்ட நாடு. தகவல் தொழில்நுட்பம், வணிகச் செயன்முறை வெளிக்கொள்வனவு (BPO), சுற்றுலா ஆகியவற்றைச் சேவை ஏற்றுமதியில் முக்கியத் துறைகளாக வளரக்கூடியவை என சர்வதேச நாணய நிதியம் அடையாளப்படுத்தியுள்ளது.

இத்துறைகளைத் தனித்தனியாகப் பார்க்காமல், இலங்கை தன்னைப் பிராந்தியச் சேவை மற்றும் இணைப்பு மையமாக நிலைநிறுத்தலாம். தனது பலமான துறைகளை இனங்கண்டு, வெளிநாட்டுக் கொள்கையை முறையாகப் பயன்படுத்த இலங்கை தவறிவிட்டது. சரியாக இனங்காணப்பட்ட கொள்கையின் அமுல்படுத்தலை உள்நாட்டு அரசியல் தடுக்கக் கூடாது.

இன்றைய சூழலில் அணிசேராக் கொள்கை எவ்வளவு பொருத்தமானது?

அணிசேராமை இலங்கையின் வெளிநாட்டுக் கொள்கையின் அடையாளமாக இருந்து வந்துள்ளது. இரண்டாம் உலகப் போருக்குப் பின்னர் உருவான கருத்தாக்கம் இது. அமெரிக்கா தலைமையிலான அணியுடனோ சோவியத் ஒன்றியம் தலைமையிலான அணியுடனோ சேராமல், தமது நலன்களை முன்னெடுக்க வளரும் நாடுகள் ஆரம்ப நடவடிக்கைகளை எடுத்தன. திருமதி சிறிமாவோ பண்டாரநாயக்காவின் தலைமையில், அணிசேரா இயக்கத்தில் இலங்கை முன்னணிப் பங்கு வகித்தது.

அதன் கருத்தியல் பொருள் இன்றும் பொருத்தமானதே. இன்று உலகில் பல கூட்டணிகள் உள்ளன. தனக்கு எது சிறந்தது என்பதை இலங்கை தெரிவு செய்ய வேண்டும். இது விடயம் சார்ந்த அணுகுமுறை. தனது அமைவிடம் காரணமாக அனைவருடனும் இலங்கை உறவாட வேண்டியுள்ளது. இந்தியா, சீனா, ஜப்பான், அமெரிக்கா, ஐரோப்பா, ரஷ்யா ஆகிய அனைத்தும் இலங்கைக்குச் சமமாக முக்கியமானவை.

வர்த்தக, முதலீட்டு வாய்ப்புகள் நிறைந்த வளர்ந்துவரும் பிராந்தியமாக ஆபிரிக்காவையும் இலங்கை நோக்க வேண்டும். அதன்படி, கொள்கை என்பது அனைவருடனும் நட்பு, எவருடனும் பகைமை இல்லை என்பதே. எல்லாத் தரப்புகளுடனும் நட்புறவைப் பேணலாம்; ஆனால் வெவ்வேறு சமன்பாடுகளில் அவை அமையும்.

இலங்கையின் வெளிநாட்டுக் கொள்கைச் சமன்பாட்டில் ரஷ்யா எங்கு அமைய வேண்டும்?

சவாலான காலங்களில் ரஷ்யா வழங்கிய முக்கிய ஆதரவைக் கருத்தில் கொண்டு, இலங்கையின் வெளிநாட்டுக் கொள்கைச் சமன்பாட்டில் ரஷ்யாவுக்கு ஓர் இடம் இருக்க வேண்டும். யுத்த காலத்தில் மேற்குலக நாடுகள் இலங்கைக்கு எதிராக நின்றபோது, ரஷ்யா இலங்கைக்காக முன்வந்தது. அந்த உறவு இன்றும் சுற்றுலா, வர்த்தகம், கல்வி உள்ளிட்ட துறைகளில் தொடர்கிறது.

இருப்பினும் அந்த உறவு, இலங்கையின் தேசிய நலன்கள் என்ற பரந்த சூழலில் பார்க்கப்பட வேண்டும். வெளிநாட்டு உறவுகள் தொடர்ந்து பரிணமிக்கின்றன. புவிசார் அரசியல் சூழல் மாறிவிட்டது என்பதற்காக ஒரு நாட்டுடனான உறவை இலங்கை கைவிடுவதற்குக் காரணம் இல்லை.

அதே நேரத்தில் இலங்கை தேவையான சமநிலையைப் பேண வேண்டும். குறிப்பாக இந்தியா, சீனா, அமெரிக்கா, ஐரோப்பிய ஒன்றியம், ஜப்பான் ஆகிய அனைத்து முக்கிய வல்லரசுகளுடனும் நல்லுறவு பேணப்பட வேண்டும்.

துரதிர்ஷ்டவசமாக, ரஷ்யா–உக்ரைன் மோதல் சர்வதேசச் சூழலைச் சிக்கலாக்கியுள்ளது. உத்தி சார்ந்த சமநிலையும் திறந்த உரையாடலும் சம்பந்தப்பட்ட அனைவருடனும் சிறந்த உறவுகளுக்கு வழிவகுக்கும். எவருடனும் உறவுகளைப் பாதிக்காமல் இலங்கையின் நலன்கள் நிறைவேற வேண்டும்.

பிராந்தியத்துடன் இலங்கையின் மேம்பட்ட இணைப்பு எவ்வளவு முக்கியம்?

இன்றைய உலகில் இணைப்பே திறவுகோல். சுற்றுலா, எரிசக்தி, மக்களுக்கிடையிலான தொடர்புகள் போன்ற துறைகளில் நாடுகள் எவ்வளவு ஆழமாக இணைகின்றனவோ, அவ்வளவு பெரிய பொருளாதாரப் பயன்கள் கிடைக்கும். பிராந்திய இணைப்பே சிறந்தது.

மின்சார வர்த்தகத்துக்காக இந்தியா, இலங்கை ஆகியவற்றின் மின்கட்டமைப்புகளை இணைக்க வேண்டும் என்ற யோசனை முன்மொழியப்பட்டுள்ளது. பொருளாதார ரீதியாகச் சாத்தியமான இந்த யோசனை நிறைவேற்றப்பட வேண்டும். ஆயினும், உள்நாட்டு எரிசக்திப் பாதுகாப்பின் மீதான கட்டுப்பாட்டில் இலங்கை தனது விழிப்பைத் தளர்த்தக் கூடாது.

இந்தியா இன்று ஒரு பெரும் வல்லரசு; உலகின் முக்கியப் பொருளாதார வலிமை மிக்க நாடுகளில் ஒன்று. இயல்பாகவே, வர்த்தகத்தின் மூலம் இந்தியாவுடனான இணைப்பு இலங்கைக்கு நிச்சயம் பயனளிக்கும். பிராந்தியத்துடனான மக்கள் தொடர்புகளை மேலும் மேம்படுத்துவதும் முக்கியம்.

இந்தியாவுடன் சிறந்த உறவுகளைப் பேணுவதோடு, இலங்கையின் பாரம்பரிய நண்பனான பாகிஸ்தானையும் நோக்க வேண்டும். பெரிய நடுத்தர வர்க்கத்தைக் கொண்ட பாகிஸ்தானுடன் வர்த்தகத்தில் இலங்கை இன்னும் அதிகம் செய்ய முடியும். தற்போது நடைமுறையில் உள்ள சுதந்திர வர்த்தக உடன்படிக்கையை இன்றைய சூழ்நிலையில் விரிவுபடுத்த வேண்டும். பங்களாதேஷில் பல இலங்கை நிறுவனங்கள் முதலீடு செய்துள்ளன. நேபாளம், பூட்டான், மாலைதீவு ஆகியவற்றுடனான உறவுகள் உறுதியாக உள்ளன. மேம்பட்ட பிராந்திய இணைப்பு மேலும் பயன்களையும், உலக அரங்கில் சிறந்த பேரம் பேசும் ஆற்றலையும் வழங்கும்.

இந்தியா–பாகிஸ்தான் வேறுபாடுகள் காரணமாக சார்க் (SAARC) கிட்டத்தட்ட செயலிழந்த அமைப்பாகிவிட்டது. பிம்ஸ்டெக் (BIMSTEC) பாகிஸ்தான் இல்லாமல் இயங்குகிறது. இலங்கையே நடுநிலை வகிக்கும் ஒரே நாடு என நம்புகிறேன். அதனால் பிராந்திய ஒருங்கிணைப்பில் இலங்கை உறுதிப்படுத்தும், மத்தியஸ்த பாத்திரத்தையும் வகிக்க முடியும். ஆனால் இந்தியா–பாகிஸ்தான் பகைமையால் நிலைமை சிக்கலாகவே தெரிகிறது.

பயங்கரவாதத்தையும் தீவிரவாதத்தையும் எதிர்ப்பதில் பிராந்திய ஒத்துழைப்பு தேவை. ஒன்றிணைக்கும் சக்தியாக இருக்க இலங்கையே சிறந்த நிலையில் உள்ளது.

21ஆம் நூற்றாண்டில் இராஜதந்திரம் எதிர்கொள்ளும் மிகப்பெரிய சவால்கள் எவை?

இன்று இராஜதந்திரத்தின் எல்லை பெருமளவு விரிவடைந்துள்ளது. மாற்றத்தின் வேகத்துடன் அதனால் ஈடுகொடுக்க முடியவில்லை. செயற்கை நுண்ணறிவின் (AI) வளர்ச்சியுடன் புதிய வாய்ப்புகளும் சவால்களும் தோன்றியுள்ளன. மோதல்களைத் தடுக்கும் தற்போதைய கருவிகள் களைத்துப் போனவையாகத் தெரிகின்றன. உலகில் பழமைவாத சக்திகளின் எழுச்சியும் புதிய தலைமுறையினரின் எதிர்பார்ப்புகளில் ஏற்பட்ட மாற்றமும் பல நாடுகளின் அரசியலுக்குச் சவால் விடுத்துள்ளன.

உண்மையில், நாம் மிகவும் போட்டி நிறைந்த உலகில் வாழ்கிறோம். பொருளாதாரப் பாதுகாப்பு, வர்த்தகம், தொழில்நுட்பம், இணையப் பாதுகாப்பு, காலநிலை மாற்றம், எரிசக்தி, உணவுப் பாதுகாப்பு, புலம்பெயர்வு ஆகியவற்றை இராஜதந்திரம் கையாள வேண்டியுள்ளது. தவறான தகவல்களையும் திட்டமிட்ட பொய்த் தகவல்களையும் எதிர்கொள்வதும் அதன் செயற்பாடுகளின் ஒரு பகுதியாகிவிட்டது. இன்றைய இராஜதந்திரிகள் பல்திறன் கொண்டவர்களாக இருக்க வேண்டும்.

இந்தச் சவால்களை வெற்றிகரமாகக் கடந்து இலங்கையை வழிநடத்தக்கூடிய, உலகத் தரம் வாய்ந்த இராஜதந்திரிகளை உருவாக்கும் ஒரு முறையான கல்வி நிறுவனத்தை இலங்கை நிறுவ வேண்டிய தருணம் இது. இந்தத் துறையில் இன்று பெரும் இடைவெளி உள்ளது. இலங்கைக்கு உயர் திறன் கொண்ட இராஜதந்திரப் பணியாளர் தொகுதி தேவை.

பொருளாதார நலன்கள், வர்த்தகம், முதலீடு ஆகியன நாடுகளுக்கிடையிலான உறவுகளில் எவ்வாறு தாக்கம் செலுத்துகின்றன?

இயல்பாகவே, வர்த்தக, முதலீட்டு உறவுகள் நாடுகளை நெருக்கமாக்குகின்றன. சில சமயங்களில் ஆழமான அரசியல் வேறுபாடுகளையும் ஒதுக்கிவைக்கும் அளவுக்கு, வெறும் புவிசார் அரசியல் மோதல்களை விடப் பொருளாதார நலன்களே முன்னுரிமை பெறுகின்றன.

இதற்குச் சிறந்த உதாரணம் அமெரிக்கா–சீனா உறவுகள். பெரும் புவிசார் அரசியல் போட்டியாளர்களாக இருந்தும், இந்த இரு பொருளாதார வல்லரசுகளும் ஆழமாகத் தங்கியிருக்கின்றன. சீன ஜனாதிபதி ஷி ஜின்பிங்கை வொஷிங்டன் டி.சி.யில் அமெரிக்க ஜனாதிபதி டொனால்ட் ட்ரம்ப் வரவேற்றபோது இது புலப்பட்டது. இதேபோல், பிரிக்ஸ் உச்சிமாநாட்டில் இந்தியப் பிரதமர் நரேந்திர மோடியும் ஜனாதிபதி ஷியும் சந்தித்தபோது, எல்லைப் பதற்றங்களை முகாமைத்துவம் செய்துகொண்டே பொருளாதாரக் கூட்டுறவில் முன்னேறத் தீர்மானித்தனர். இதனால் இந்தியா–சீனா உறவுகளிலும் தணிவு ஏற்பட்டது.

அதிக பணயம் கொண்ட புவிசார் அரசியலில், பொருளாதார, பாதுகாப்புக் கட்டாயங்கள் கருத்தியல் பிளவுகளை அடிக்கடி மீறுகின்றன. 2025 ஓகஸ்டில் அலாஸ்காவின் அன்கரேஜிலுள்ள எல்மென்டோர்ப்–ரிச்சர்ட்சன் கூட்டுத் தளத்தில் நடைபெற்ற ரஷ்யா–அமெரிக்க உச்சிமாநாடு இதனை மேலும் நிரூபித்தது. உக்ரைன் போர் தொடர்பான சமாதானப் பேச்சுவார்த்தைகளுக்காக ஜனாதிபதி ட்ரம்ப் ஜனாதிபதி விளாடிமிர் புட்டினை அங்கு வரவேற்றார். கடுமையான உலகளாவிய எதிர்ப்புகள் இருந்தும் நேரடியாகப் பேச்சுவார்த்தையில் ஈடுபடும் நடைமுறைசார் விருப்பத்தை அது எடுத்துக்காட்டியது.

அதேசமயம், வரலாற்று நினைவுகளும் பொருளாதார–உத்தி சார்ந்த உறவுகளும் இறுக்கமான கூட்டணிகளை விட, வெளிநாட்டுக் கொள்கையை வழிநடத்துகின்றன. புது டெல்லியில் நடைபெற்ற 62ஆவது முனிச் பாதுகாப்பு மாநாட்டுக் கூட்டத்தில் உரையாற்றிய இந்திய வெளிவிவகார அமைச்சர் எஸ். ஜெய்சங்கர், இந்தியாவின் அயலில் இருந்த இராணுவ ஆட்சியை உலகின் பெரும்பகுதி ஆதரிக்க விரும்பிய காலத்தில், இந்தியாவுடன் மிகச் சிறந்த உறவுகளைக் கொண்டிருந்த நாடு ரஷ்யா என வலியுறுத்தினார். அந்த மரபால் இந்தியா–ரஷ்யா உறவுகள் பல வழிகளில் வடிவமைக்கப்பட்டுள்ளன என்றும், இருதரப்பு உறவு வலுவான பொருளாதாரப் பங்காண்மையாகவும் விரிவடைந்துள்ளது என்றும் அவர் சுட்டிக்காட்டினார்.

ஒட்டுமொத்தமாக, பொருளாதார இராஜதந்திரமும் தேசிய நலனுமே சர்வதேச உறவுகளின் உண்மையான உந்துசக்திகளாகத் தொடர்கின்றன.

உலகத் தெற்கில் (Global South) இலங்கை எவ்வளவு தீவிரமாகச் செயற்பட வேண்டும்?

உலகத் தெற்கில் தனது முன்னணிப் பாத்திரத்தை இலங்கை மீளப் பெற வேண்டும். சிந்தனையொத்த நாடுகளுடன் மேலும் மேலும் அது இணைந்திருக்க வேண்டும். 2026 செப்டெம்பர் 12–13 ஆம் திகதிகளில் புது டெல்லியில் பாரத் மண்டபத்தில் நடைபெற்ற 18ஆவது பிரிக்ஸ் உச்சிமாநாட்டில், நேர்மறையான சொல்லாட்சி இருந்தும் தற்போதைய அரசாங்கம் ஏன் பங்கேற்கவில்லை என்பது புரியவில்லை.

சீனா, இந்தியா, ரஷ்யா ஆகியவற்றுடன் ஏனைய பல சிறிய, நடுத்தர வலுவுள்ள நாடுகளையும் கொண்ட தளம் அது. இலங்கையில் சீனாவுக்கும் இந்தியாவுக்கும் போட்டி நலன்கள் உள்ளன. அவற்றைச் சமரசப்படுத்த பிரிக்ஸ் ஒரு சிறந்த இடமாக அமையும். தென்னாபிரிக்கா, பிரேசில் போன்ற நாடுகளும் அதன் உறுப்பினர்களே.

அதேவேளை, இந்தோ–பசிபிக் பிராந்தியம் முழுவதும் உள்ள புதிய பொருளாதார முன்முயற்சிகளைப் பயன்படுத்துவதன் மூலம், பாரம்பரிய கட்டமைப்புகளுக்கு அப்பால் தனது ஈடுபாட்டை இலங்கை விரிவுபடுத்த வேண்டும். ஒரே சந்தையில் தங்கியிருப்பதிலிருந்து விலகி வர்த்தகத்தைப் பல்வகைப்படுத்தும் ஒட்டாவாவின் பரந்த உத்தியின் ஒரு பகுதியாக, கனடியப் பிரதமர் மார்க் கார்னி தென்கிழக்காசியாவை இலக்காகக் கொண்ட தீவிர வர்த்தக முயற்சியை முன்னெடுத்துள்ளார்.

ஆசியானுடன் புதிய வர்த்தகக் கட்டமைப்புகளைக் கனடா பேச்சுவார்த்தை நடத்துவதோடு, பிராந்தியத்தின் உள்கட்டமைப்பு, எரிசக்தி, இலக்கமுறைத் தொழில்நுட்பம் ஆகியவற்றில் பல பில்லியன் டொலர் முதலீடுகளையும் உறுதிப்படுத்தி வருகிறது. இந்தத் தென்கிழக்காசியப் பொருளாதார விரிவாக்கத் திட்டங்களில் பங்கேற்க இலங்கை தன்னைத் தீவிரமாக நிலைநிறுத்த வேண்டும். உலகத் தெற்கு, நடுத்தர வல்லரசுகளின் முன்முயற்சிகள் ஆகிய இரண்டிலும் பங்காளியாவது இலங்கையின் உத்தி சார்ந்த செல்வாக்கை அதிகரிக்கவும், புதிய மூலதனத்தையும் வர்த்தக வலையமைப்புகளையும் பயன்படுத்தவும் உதவும்.