தேத்தாத்தீவின் அழகு தனி அழகு

தேத்தாத்தீவின் அழகு தனி அழகு- அங்கு

தெள்ளு தமிழ் கலைகள் வந்து பழகு

கரை சூழ்ந்த கிழக்கெல்லாம்
கடலலை முழங்கும்
விரைந்தோடும் மீனவர்க்கு
முத்தள்ளி வழங்கும்

ஆதவன் வருகை கண்டு
அடம்பன் கொடி பூக்கும்
அயல் எல்லாம் வெற்றிலை
செல்வங்கள் சேர்க்கும்

மட்டுநகர் வாவி மகள்
மேற்கே வளைந்தோடும்
மணல் வயலில் வெள்ளாமை
செழிப்பாய் விளைந்தாடும்

செல்வமாய் குடியிருப்பில்
சேர்ந்தோங்கும் உழவு
சில்லென்ற குளங்களிலே விளையாடும் நிலவு

கொம்புச் சந்தியான் உயர்ந்து
காண்போரை ஈர்ப்பார்
கோயிலை வலம் வந்து
ஊரெல்லாம் காப்பார்

நம்பிக்கையில் வாழும் மக்கள்
முன்னேற்றம் காட்டும்
நாள்தோறும் வாழ்ந்திடவே
கல்வியை ஊட்டும்