இன்றய தேவை தேர்தலல்ல

பொருளாதாரக் கோட்பாட்டின் படி, பொருளாதார நெருக்கடியை எதிர்கொள்ளும் ஒரு நாடு அந்த நாட்டு மக்களுக்கு உதவி வழங்குவது முடியாத காரியம், அது தவறானதாகவே சுட்டிக்காட்டப்படுகின்றது. அதனால் அவர்களுக்கு அனைத்து சலுகைகளும் குறைக்கப்பட வேண்டும், அத்துடன் வரிகளை உயர்த்துவதன் மூலம் அரசின் வருவாயை அதிகரிக்க வேண்டும் என்றும் உலக நிதி நிறுவனங்கள் அறிவுறுத்துகின்றன. ஆனால், மக்கள் உணர்வுடன் செயல்படும் அரசால் உலக வங்கியின் அறிவுரையை முழுமையாக ஏற்க முடியாது. அத்தகைய அரசாங்கம் பொருளாதாரக் கோட்பாடுகளை ஒதுக்கி வைத்துவிட்டு மக்களை வாழ வைக்க நிபந்தனையின்றி முன்வர வேண்டும். 

இந்நாட்டின் சமுர்த்தி திணைக்களத்தின் அறிக்கையின்படி 300,000 குடும்பங்கள் மிகவும் வறுமையில் வாடுகின்றனர். அந்த குடும்பங்கள் பல்வேறு உதவிகளில் தங்கள் வாழ்க்கையை கட்டமைக்கின்றன. தற்போதைய பொருளாதார நெருக்கடியால் அவர்கள் கடுமையாக பாதிக்கப்பட்டுள்ளனர். உணவு, மருந்து, எரிபொருள், எரிவாயு அனைத்தும் மிக சவாலாக இருக்கின்றது. எரிபொருள் மற்றும் எரிவாயுவை கைவிட்டாலும், உணவு மற்றும் மருந்து இல்லாமல் உயிர் வாழ முடியாது. சிறுநீரக நோயாளியின் மாதாந்தச் செலவுகளை ஏழைக் குடும்பத்தால் ஏற்க முடியாது. நீரிழிவு, இதய நோய், உயர் ரத்த அழுத்தம் போன்ற தீராத நோய்களால் அவதிப்படும் ஏழைக் குடும்பங்களும் ஏராளம். இம்மக்களுக்கு ஏதாவது நிவாரணம் வழங்க முடியுமானால் அது தேசிய சேவையாகவே கருத முடியும்.

வறுமையை தீர்மானிக்க பயன்படுத்தப்படும் அளவுகோல்கள் நூறு சதவீதம் துல்லியமாக இருக்காது. சமுர்த்தி சலுகைகளை வழங்குவதற்கு அரசியலையும் ஒரு காரணமாகக் கொள்ளவேண்டும்;. ஜனசவியவுக்கான குடும்பங்களை தெரிவு செய்வதிலும் இது போன்ற சம்பவங்கள் நடந்துள்ளன. ஆனால் தற்போது அவற்றை சுத்தம் செய்ய வாய்ப்பு இல்லை. பொதுவாக ஏழைகளாகக் கருதப்படும் அனைவருக்கும் இன்று உதவ வேண்டும். அதனடிப்படையில் சம்பந்தப்பட்ட குடும்பங்களுக்கு மாதம் ரூ.5,000 அல்லது ரூ.7,500 வழங்குவதில் அரசு கவனம் செலுத்துகிறது. உதவி குறைந்தது மூன்று மாதங்களுக்கு தொடர வேண்டும்.

நாடு தற்போது விலைவாசி உயர்வை சந்தித்து வருகிறது. பொருட்கள் மற்றும் சேவைகளின் விலைகள் வேகமாக உயர்ந்து வருகின்றன. இந்த உயர்வின் மறைமுக விளைவாக, பொருட்கள் மற்றும் சேவைகளின் தட்டுப்பாடு மற்றொரு படி உயரலாம். ஆனால், ஆதரவற்ற குழந்தைகளின் மூன்று மில்லியன் குடும்பங்களின் வாழ்வாதாரம் அதையெல்லாம் விட முக்கியமானது என்பதனை அரசாங்கம் கருத்தில் கொள்ளவேண்டும். நாட்டின் பொருளாதாரம் ஓரளவு ஸ்திரத்தன்மையை வெளிப்படுத்தும் வரை மேற்கண்ட உதவிகளை வழங்குவது பொருத்தமானது என நாம் கருதுகிறோம். ஒரு நாட்டின் மதிப்புமிக்க வளம் மனித வளம். அதை பாதுகாக்க ஒரு அரசு அதிகாரப்பூர்வமாக கடமைப்பட்டுள்ளது. வருங்காலத்தில் உணவு நெருக்கடி விஸ்வரூபம் எடுக்கும் என்றும் கணிப்புகள் உள்ளன. 

உணவு நெருக்கடியை நினைக்கும் போது இரண்டு நிகழ்வுகள் நினைவுக்கு வருகின்றன. ஒன்று முன்னொரு காலத்தில் இருந்ததாகக் கூறப்படும் அதிக பஞ்சம். அன்றைய காலத்தில் இலங்கையர்கள் மரங்களின் பட்டையை உண்டு வாழ்வாதாரம் செய்ய வேண்டியிருந்தது என்று கூறப்படுகிறது. சுமார் பன்னிரண்டு ஆண்டுகள் பஞ்சம் நீடித்ததாகவும் வரலாறு காட்டுகிறது. இரண்டாவது எத்தியோப்பியாவில் நீண்ட காலமாக நிலவும் பஞ்சம். அதுவும் பன்னிரண்டு ஆண்டுகளுக்கு மேல் நீடித்தது. சமீப காலம் வரை, உணவு நெருக்கடி மற்றும் பஞ்சத்தின் சின்னமாக எத்தியோப்பியாவில் ஒரு ஏழை குழந்தை இருந்தது. ஆனால் எத்தியோப்பியாவால் அந்த துயர வரலாற்றை மாற்ற முடிந்தது. 

அந்தவகையில் இலங்கையும் பல இக்கட்டான காலகட்டங்களை கடந்து வருகின்றது மேலும் மீண்டும் மிகவும் கடினமான காலகட்டங்களை எதிர்கொண்டுள்ளது. இது சுதந்திரத்திற்குப் பிறகு ஏற்பட்ட மோசமான பொருளாதாரச் சரிவு என்று விளக்கப்படுகிறது. இன்று சர்வதேச சமூகம் இலங்கைக்கு மனிதாபிமான உதவிகளை வழங்க முன்வந்துள்ளது. கொழும்பு துறைமுகத்திற்கு மனிதாபிமான உதவிக் கப்பலை தமிழக அரசு அனுப்பியுள்ளது. சர்வதேச உதவிகள், கடன்கள் மற்றும் உதவிகள் இல்லாமல் ஒரு நாட்டை கட்டியெழுப்புவது தற்போது சாத்தியமில்லை. அதனால் இப்போது செய்ய வேண்டியது தேர்தலுக்கு தயாராவது அல்ல, மிகக் குறுகிய காலத்தில் நாட்டை மீட்டெடுப்பதற்கு நாம் பங்ளிக்கவேண்டும் என்பதே.