பூகோள பதட்டங்களுக்கு மத்தியில் இந்தியாவும் சீனாவும்- வர்த்தக உறவின் புதிய அத்தியாயம்

அரசியல் பூகோளத்தில் இந்தியாவுக்கும் சீனாவுக்கும் இடையிலான உறவுகள் எப்போதுமே சிக்கலானதொரு புதிருக்கு ஒப்பானது. எல்லைப் பிணக்குகள், இராணுவ மோதல்கள் மற்றும் இராஜதந்திர சவால்கள் எனப் பல தடைகளைத் தாண்டி, இரு நாடுகளும் ஒரு பொதுவான பொருளாதாரப் பாதையில் பயணிப்பதை இன்று உலகம் உற்றுநோக்கி வருகிறது. எதிரிகளாக இல்லாமல் கூட்டாளிகளாக மாற, இரு நாடுகளுக்கும் இடையே குறிப்பிடத்தக்க அளவிலான நிரப்புத்தன்மைகளும், பரஸ்பர மரியாதையும், பரஸ்பர உணர்திறனும், ஆர்வமும் வழிகாட்டும் கொள்கைகளாக இருதரப்பும் வலியுறுத்தி வந்துள்ளதை அவதானிக்க முடிகிறது. இது வெறுமனே ஒரு அரசியல் இராஜதந்திர நகர்வு மட்டுமல்ல, கோவிட் -19 போன்ற உலகளாவிய நெருக்கடிகள் கூட உத்வேகத்தை அளித்து, புதியதோர் பொருளாதார அத்தியாயத்தை எழுத வழி வகுத்துள்ளன. இந்தியப் பிரதமர் நரேந்திர மோடியின் தியான்ஜின் வருகை, ஷாங்காய் ஒத்துழைப்பு அமைப்பு (SCO)உச்சிமாநாட்டில், அமெரிக்காவுடனான உறவுகளில் நிச்சயமற்ற தன்மை நிலவும் இத்தருணத்தில், இருதரப்புப் பொருளாதாரப் பிணைப்பை பல்வகைப்படுத்துவதற்கும், பிராந்தியத் தலைமைப் பதவியை வலுப்படுத்துவதற்கும் சீனாவுக்கு உதவும் அதே வேளை, இந்தியாவுக்கு புதியதோர் பொருளாதார வாயிலைத் திறந்துவிட்டுள்ளது.

இந்திய-சீன வர்த்தகத்தின் பிரமாண்ட வளர்ச்சி: ஓர் ஆய்வு

அண்மைக் காலத்தில் இந்திய-சீன வர்த்தக உறவுகள், அரசியல் பதட்டங்களுக்கு மத்தியில் எதிர்பாராத விதமாக பல மடங்கு வளர்ந்துள்ளதைக் கண்கூடாகக் காணலாம். 2019-20 காலப்பகுதியில் 81.7 பில்லியன் அமெரிக்க டொலர்களாக இருந்த இருதரப்பு வர்த்தகம், 2024-25 காலப்பகுதியில் 127.7 பில்லியன் அமெரிக்க டொலர்களாக உயர்ந்துள்ளதாக மதிப்பீடுகள் தெரிவிக்கின்றன. இந்த வளர்ச்சி விகிதம் வெறும் எண்களைக் கடந்து ஒரு முக்கியமான செய்தியை நமக்குச் சொல்கிறது. அது, பூகோள அரசியல் நெருக்கடிகள் எவ்வளவு தீவிரமானவையாக இருந்தாலும், பொருளாதார நலன்கள் என்றொரு சக்தி இரு நாடுகளையும் இணைக்கின்றது என்பதே.

இந்த பிரமாண்டமான வர்த்தக விரிவாக்கத்தின் மையத்தில் இருப்பது, இந்தியாவின் சீனப் பொருட்களுக்கான அதிகப்படியான இறக்குமதிதான். மின்னணுவியல் பொருட்கள், இயந்திரங்கள், ரசாயனங்கள் மற்றும் தொழில்துறை உள்ளீடுகள் போன்ற அத்தியாவசியப் பொருட்களை இந்தியா சீனாவிடமிருந்து இறக்குமதி செய்கிறது. உதாரணமாக, கடந்த சில ஆண்டுகளாக சீனாவிலிருந்து ஸ்மார்ட்போன்கள், மடிக்கணினிகள் மற்றும் தொலைத்தொடர்பு வன்பொருட்களின் இறக்குமதிகள் கணிசமாக அதிகரித்துள்ளன. கோவிட் -19 தொற்றுநோய் காலத்தின்போது, மருந்துப் பொருட்கள், மருத்துவ உபகரணங்கள் மற்றும் டிஜிட்டல் வன்பொருட்களை வழங்குவதில் சீனா வகித்த முக்கிய பங்கை ஒருபோதும் புறக்கணிக்க முடியாது. இந்தக் காலகட்டத்தில், உலகளாவிய விநியோகச் சங்கிலி (Global Supply Chain) சீர்குலைந்திருந்தபோது, சீனாவின் உற்பத்தித் திறன் இந்தியாவின் தேவைகளை ஓரளவு பூர்த்தி செய்ய உதவியது. இது, இந்தியாவின் சீனப் பொருட்களுக்கான தங்கியிருத்தல் எந்தளவு ஆழமானது என்பதைக் காட்டுகிறது.

பிரிவு	முக்கிய இறக்குமதிப் பொருட்கள்	முக்கிய ஏற்றுமதிப் பொருட்கள்
மின்னணுவியல் & எந்திரங்கள்	ஸ்மார்ட்போன்கள், மடிக்கணினிகள், தொலைத்தொடர்பு வன்பொருள்	-
வேதியியல்	இரசாயனங்கள், உரங்கள்	மொத்த மருந்துகள், இடைநிலைகள்
உற்பத்தி	தொழில்துறை இயந்திரங்கள், தானியங்கி பாகங்கள்	-
தாதுக்கள்	-	இரும்புத் தாது
விவசாயம்	-	பருத்தி, அரிசி, கடல்சார் பொருட்கள்
நுகர்வோர் பொருட்கள்	பொம்மைகள், வீட்டு மின்னணுவியல்	-

வர்த்தகப் பற்றாக்குறை: ஓர் ஆழ்ந்த பிரச்சினை

இருதரப்பு வர்த்தகம் பெருமளவு அதிகரித்திருந்தாலும், ஒரு குறிப்பிடத்தக்க வர்த்தகப் பற்றாக்குறை இந்தியாவின் பக்கம் உள்ளது. சீனாவிற்கான இந்தியாவின் ஏற்றுமதி வர்த்தகம் அதன் இறக்குமதி வர்த்தகத்துடன் ஒப்பிடும்போது குறைவாகவே உள்ளது. ஏற்றுமதித் தளமானது கனிமப் பொருட்கள், இரசாயனங்கள், மருந்துகள் மற்றும் விவசாயப் பொருட்கள் போன்ற சில குறிப்பிட்ட துறைகளில் மட்டுமே குவிந்துள்ளது. உதாரணமாக, இரும்புத் தாது, சீனாவின் பிரமாண்ட எஃகுத் தொழிலுக்கு சேவை செய்வதில் இந்தியாவின் மிகப்பெரிய ஏற்றுமதியாக உள்ளது. அதே சமயம், பருத்தி, அரிசி போன்ற விவசாயப் பொருட்களும், மொத்த மருந்துகள் போன்ற வேதியியல் பொருட்களும் இந்தியாவின் ஏற்றுமதிப் பட்டியலில் குறிப்பிடத்தக்க இடத்தைப் பெற்றுள்ளன.

ஆனால், சீனாவிலிருந்து இந்தியா செய்யும் இறக்குமதியானது மிக விரிவானது, பல்வகைத்தன்மை கொண்டது. அத்துடன் இந்தியாவின் தொழில் மற்றும் நுகர்வோர் துறைகளுக்கு அது மையமானது. ஸ்மார்ட்போன்கள், மின் இயந்திரங்கள், சூரிய ஒளிமின்னழுத்த செல்கள் மற்றும் ஆட்டோமொபைல் கூறுகள் போன்ற அத்தியாவசியப் பொருட்கள் இந்தியாவின் பொருளாதாரத்துடன் ஆழமாகப் பிணைந்துள்ளன. இந்த இறக்குமதிகள் தான் இந்தியாவின் பொருளாதார வளர்ச்சிக்குத் தேவையான உள்ளீடுகளை குறைந்த விலையில் வழங்குகின்றன. இந்தத் தங்கியிருத்தல் தான், இருதரப்பு வர்த்தகத்தில் ஒரு சமநிலையற்ற தன்மையை உருவாக்கி, இந்தியாவிற்கு ஒரு வர்த்தகப் பற்றாக்குறையை தொடர்ந்து ஏற்படுத்தி வருகின்றது.

முதலீட்டுத் தடைகள் மற்றும் வாய்ப்புகள்

வர்த்தக உறவுகளை வலுப்படுத்துவதில் முதலீடுகள் ஒரு முக்கியமான அங்கமாகும். ஆனால், இருதரப்பு வர்த்தகத்தின் பிரமாண்டத்துடன் ஒப்பிடும்போது, இந்திய-சீன முதலீடுகள் மிதமான அளவிலேயே இருந்துள்ளன. இந்தியாவில் சீன முதலீடுகள் பெரும்பாலும் தொழில்நுட்பம், உள்கட்டமைப்பு மற்றும் உற்பத்தித் துறைகளில் குவிந்துள்ளன. 2020ஆம் ஆண்டில் சீன முதலீடுகளுக்கான விதிமுறைகளை இந்தியா இறுக்கிய பிறகு, பல சீன தொழில்நுட்ப நிறுவனங்களும், துணிகர மூலதன நிதி நிறுவனங்களும் இந்தியாவில் புதிய முதலீடுகளைச் செய்வதில் தயக்கம் காட்டின. அதற்கு முன்னர், அலிபாபா, டென்சென்ட் மற்றும் ஷியோமி போன்ற நிறுவனங்கள் இந்தியாவின் மின்-கொமர்ஸ் மற்றும் மொபைல் பயன்பாட்டுத் துறைகளில் கணிசமான முதலீடுகளைச் செய்து, இந்தியாவின் டிஜிட்டல் சுற்றுச்சூழல் அமைப்பிற்குப் பங்களித்தன.

மறுபுறம், சீனாவில் இந்திய முதலீடுகள் மருந்துகள், தகவல் தொழில்நுட்பச் சேவைகள் மற்றும் வாகனத் துறைகளில் மட்டுமே குவிந்துள்ளன. இந்தத் துறைகளில் இந்தியாவின் பலம் வெளிப்பட்டாலும், ஒட்டுமொத்த முதலீட்டுப் பங்களிப்பு இன்னமும் வர்த்தக அளவிற்கு இணையாக இல்லை. இந்த முதலீட்டுத் தொடர்புகளை வலுப்படுத்துவது, இரு பொருளாதாரங்களுக்கும் இடையே உள்ள நிரப்புத்தன்மைகளைப் பயன்படுத்த உதவும். இந்தியா ஒரு பெரிய நுகர்வோர் சந்தையையும், திறன் வாய்ந்த பணியாளர்களையும் வழங்க, சீனா மேம்பட்ட உற்பத்தி மற்றும் செலவு நன்மைகளை வழங்க முடியும். எதிர்காலத்தில், இந்தியாவின் பசுமை ஆற்றல், மின்சார இயக்கம் மற்றும் டிஜிட்டல் மாற்றங்கள் போன்ற துறைகளில் சீன நிபுணத்துவமும் முதலீடும் ஒரு பங்கினை வகிக்க முடியும். இதேபோல், தகவல் தொழில்நுட்ப சேவைகள், மருந்துகள் மற்றும் புத்தாக்கம் சார்ந்த துறைகளில் இந்தியாவின் பலங்கள் சீனச் சந்தையில் வாய்ப்புகளைப் பெறலாம்.

கடைசி வார்த்தை

இந்திய-சீன உறவுகள், பூகோள அரசியல் சவால்கள் மற்றும் பரஸ்பர நம்பிக்கையின்மை ஆகியவற்றுக்கு மத்தியில், ஒரு பிராந்திய சக்தி சமநிலையை நிறுவ, பொருளாதார ஒத்துழைப்பின் மூலம் நடைமுறை ரீதியான சகவாழ்வை நாடும் ஒரு பரிணாம மாற்றத்தைக் காட்டுகிறது. இரு நாடுகளும் வர்த்தகம், முதலீடு மற்றும் தொழில்நுட்பப் பரிமாற்றங்கள் மூலம் தங்கள் பொருளாதாரங்களை ஒன்றிணைக்க முயற்சிப்பதன் மூலம், இந்த உறவு எதிர்காலத்தில் மேலும் வலுப்பெறும். எனினும், நீண்ட கால உறவுகளுக்கு வர்த்தகப் பற்றாக்குறை, முதலீட்டுத் தடைகள் மற்றும் எல்லைப் பிணக்குகள் போன்ற சிக்கல்களுக்கு உறுதியான தீர்வுகள் அவசியம்.