போதைச் சங்கிலியை உடைத்தல் ஓராண்டின் கணக்கும் அடுத்த ஆண்டின் சவாலும்

 ஒரு கிலோகிராம் ஹெராயினைப் பறிமுதல் செய்வது செய்தி. அந்த ஹெராயினை நாட்டுக்குள் கொண்டுவந்த பணப்பாதையை அடையாளம் கண்டு அறுப்பது கொள்கை. இலங்கையின் போதைப்பொருள் விவாதம் இதுவரை செய்தியின் எல்லைக்குள்ளேயே நின்றுவிட்டது. 30 ஒக்டோபர் 2025 அன்று தொaடங்கப்பட்ட ‘ரதம ஏகத’ (Ratama Ekata – முழு நாடும் ஒன்றாக) தேசிய நடவடிக்கை, அந்த விவாதத்தைக் கொள்கைத் தளத்துக்கு நகர்த்த முயல்கிறது. ஓராண்டு நிறைவடையும் இவ்வேளையில், கணக்குப் பார்ப்பதும் அடுத்த கட்டத்தைத் திட்டமிடுவதும் தவிர்க்க முடியாதவை.

போதைப்பொருளைத் தெருமுனையில் நடக்கும் சிறு வணிகமாக மட்டும் பார்ப்பது தவறான நோயறிதல். அது ஒரு Organised Crime Economy (ஒழுங்கமைக்கப்பட்ட குற்றப் பொருளாதாரம்). மூலப்பொருளைக் கொண்டுவருவோர், கடல்வழிப் போக்குவரத்து, உள்நாட்டு விநியோகம், சில்லறை விற்பனை, இலாபத்தைச் சட்டப்பூர்வமாக்கும் Money Laundering (பணச்சலவை) என ஒவ்வொரு கட்டமும் ஒரே சங்கிலியின் கண்ணிகளாக இயங்குகின்றன. ஒரு கண்ணி அறுந்த பின்னரும் சங்கிலி இயங்குகிறதென்றால், அதன் வலிமை வேறெங்கோ இருக்கிறது என்றே பொருள். அந்த வலிமை பணத்திலும் பாதுகாப்பிலும் தங்கியுள்ளது.

புள்ளிவிவரங்கள் இந்த நடவடிக்கையின் வீச்சைக் காட்டுகின்றன. அமைச்சரவைச் செய்தியாளர் சந்திப்பில் அமைச்சர் நளிந்த ஜயதிஸ்ஸ வெளியிட்ட தகவலின்படி, 30 ஒக்டோபர் 2025 முதல் 18 ஒக்டோபர் 2026 வரை 303,017 சந்தேக நபர்கள் கைதாகியுள்ளனர். ஹெராயினுக்கு எதிரான 97,074 சோதனைகளில் 2,485 கிலோகிராம் ஹெராயினும், 297 கிலோகிராம் கொக்கைனும் கைப்பற்றப்பட்டன. 11,146 கிலோகிராம் கஞ்சாவும் 16.7 மில்லியன் கஞ்சாச் செடிகளும் அழிக்கப்பட்டன. 1,723 கிலோகிராம் குஷ் (Kush – செயற்கையாகக் கலக்கப்பட்ட கஞ்சா வகை) மற்றும் 4.5 மில்லியன் போதை மாத்திரைகளும் இதில் அடங்குகின்றன.

இந்த எண்களை வெற்றிச் சான்றாக மட்டும் வாசிப்பது எளிது. ஆனால் அவை முதலில் உழைப்பின் அளவீடு, விளைவின் அளவீடு அல்ல. Peter Drucker சொன்னதுபோல, “முகாமைத்துவம் என்பது விடயங்களைச் சரியாகச் செய்வது; தலைமைத்துவம் என்பது சரியான விடயங்களைச் செய்வது.” கைதுகளின் எண்ணிக்கை விடயங்களைச் சரியாகச் செய்வதன் சான்று. அந்தக் கைதுகள் சரியான விடயத்தைத் தாக்குகின்றனவா என்பதே உண்மையான கேள்வி.

அந்தக் கேள்விக்கு விடையளிக்கும் ஒரு விகிதம் இந்தத் தரவுகளுக்குள்ளேயே இருக்கிறது. 303,017 கைதுகளில் சட்டவிரோதச் சொத்துக்கள் குறித்த விசாரணை தொடங்கப்பட்டவர்கள் 449 பேர் மட்டுமே; அது ஏறத்தாழ 0.15 சதவிகிதம். தடுப்புக் காவல் உத்தரவுகள் 3,749. கைது செய்யப்படுவோரில் பெரும்பாலானோர் பயன்படுத்துபவர்களும் சிறு வியாபாரிகளுமாக இருக்கக்கூடும் என்பதை இது உணர்த்துகிறது. அதில் தவறேதும் இல்லை; அவர்களும் சட்டத்தின் முன் நிற்க வேண்டியவர்களே. ஆனால் Asset Forfeiture (சொத்துப் பறிமுதல்) என்ற பகுதி இன்னும் தொடக்க நிலையிலேயே உள்ளது என்பதையும் ஒப்புக்கொள்ள வேண்டும்.

போதைப்பொருள் வர்த்தகத்தின் அடிப்படை இயந்திரம் இலாபம். சிறைக்குச் செல்லும் ஒருவர் தன் வலையமைப்பின் சொத்துக்களை வெளியில் விட்டுச் செல்லும்வரை, அவரது இடத்தை நிரப்ப இன்னொருவர் வருவார். இத்தாலி இதற்கு ஒரு பாடம். 1982 இல் இயற்றப்பட்ட Rognoni–La Torre சட்டம் மாஃபியா அமைப்புகளின் சொத்துக்களைப் பறிமுதல் செய்ய வழிவகுத்தது. பின்னர் பறிமுதல் செய்யப்பட்ட சொத்துக்களைச் சமூகப் பயன்பாட்டுக்கு வழங்கும் முறையும் வந்தது. ஆட்களைச் சிறையிலடைப்பதைவிட, அவர்களின் பொருளாதார அடித்தளத்தை இழக்கச் செய்வதே நீடித்த விளைவை ஏற்படுத்தியது என்பது அந்த அனுபவம்.

இலங்கையிலும் இதற்கான கருவிகள் உள்ளன. மத்திய வங்கியின் Financial Intelligence Unit (நிதிப் புலனாய்வுப் பிரிவு), பணச்சலவைத் தடுப்புச் சட்டம், வங்கிப் பரிமாற்றத் தரவுகள் என்பன அவற்றில் சில. தேவையானது இவற்றுக்கிடையேயான ஒருங்கிணைப்பும் வேகமும். காவல்துறை, வருமான வரித் திணைக்களம், சுங்கம், நிதிப் புலனாய்வுப் பிரிவு ஆகியவை ஒரே வழக்கில் ஒரே தரவுத்தளத்தில் இயங்கும்போதுதான் சொத்து விசாரணைகள் நீதிமன்றத்தில் நிற்கும் வழக்குகளாக மாறும். அதற்கு Intelligence-led Policing (புலனாய்வு சார் காவல்துறைச் செயற்பாடு) என்ற அணுகுமுறை அடிப்படையாகிறது.

இந்த முயற்சியின் அரசியல் பரிமாணம் தனியாகக் குறிப்பிடத்தக்கது. ஒழுங்கமைக்கப்பட்ட குற்றம் நீண்டகாலம் நிலைத்து நிற்பது, அதற்கு ஏதோ ஒரு மட்டத்தில் கிடைக்கும் அரசியல் அல்லது நிர்வாகப் பாதுகாப்பினாலேயே. ஆகவே இதில் தேவையானது சட்ட அமுல்படுத்தலுக்கு முன்னால் உள்ள Political Will (அரசியல் விருப்பு). யாரும் சட்டத்துக்கு மேலானவரல்லர் என்ற நிலைப்பாடு காகிதத்தில் இருந்தால் போதாது; உயர் பதவியில் இருப்பவர் மீதான விசாரணை ஒரு சாதாரண வியாபாரி மீதான விசாரணையைப் போலவே முன்னேறும்போதுதான் அது நம்பகத்தன்மை பெறுகிறது. அவ்வாறான ஒவ்வொரு தீர்ப்பும் இந்த நடவடிக்கைக்கான பொதுமக்கள் ஆதரவை வலுப்படுத்தும்.

எல்லைகளுக்கு வெளியே உள்ள சவாலும் குறைத்து மதிப்பிடக்கூடியதல்ல. இலங்கை இந்து மாகடலின் முக்கிய கடல் பாதையில் அமைந்துள்ளதால், ஆசியாவின் போதைப்பொருள் விநியோகப் பாதைகளின் ஒரு இடைத்தங்கல் நிலையமாகப் பயன்படுத்தப்படும் அபாயம் எப்போதும் உண்டு. வடக்கு, கிழக்குக் கடற்கரைகளும் ஆழ்கடல்ப் பாதைகளும் இதில் முக்கியத்துவம் பெறுகின்றன. ஆகஸ்ட் 2026 இல் காவல்துறை வெளியிட்ட தகவலின்படி, வெளிநாடுகளில் மறைந்திருக்கும் 93 சந்தேக நபர்கள் தொடர்பாக Red Notice (இன்டர்போலின் சிவப்பு அறிவிப்பு) நடவடிக்கைகள் எடுக்கப்பட்டுள்ளன. நாடுகடந்த வலையமைப்பை நாடுகடந்த ஒத்துழைப்பே எதிர்கொள்ள முடியும். இந்தியா, மாலைதீவு, தாய்லாந்து உள்ளிட்ட பிராந்திய நாடுகளுடனான புலனாய்வுப் பகிர்வு இதில் தீர்மானகரமானது.

இங்கே ஒரு சமநிலைப் பார்வையும் அவசியம். போதைப்பொருளுக்கு எதிரான போராட்டம் ஒரு தட்டில் Supply Reduction (விநியோகக் குறைப்பு); மறுதட்டில் Demand Reduction (தேவைக் குறைப்பு). இரண்டுமே இல்லாமல் தராசு சமநிலைப்படாது. கைதுகள் பெருகும்போது சிறைச்சாலைகளின் நெருக்கடியும் பெருகும். ஜனவரி 2026 இல் நீதி அமைச்சர் ஹர்ஷண நாணயக்கார நாடாளுமன்றத்தில் தெரிவித்தபடி, நாட்டின் சிறைச்சாலைகள் தமது கொள்ளளவைப் போல மூன்று மடங்கில் இயங்குகின்றன. போதைப்பொருள் குற்றங்களுக்காகத் தடுத்து வைக்கப்பட்டவர்கள் இந்த நெருக்கடிக்கு ஒரு முக்கிய காரணம். மறுபுறம், ஆகஸ்ட் 2026 வரை புனர்வாழ்வுக்கு அனுப்பப்பட்டோர் 1,639 பேர் மட்டுமே. இந்த இடைவெளி தவிர்க்க முடியாமல் கவனத்தை ஈர்க்கிறது.

அனுபவம் தரும் பாடங்கள் இங்கே பயனுள்ளவை. 2001 இல் போர்த்துக்கல், தனிப்பட்ட பயன்பாட்டுக்கான போதைப்பொருள் வைத்திருப்பதைக் குற்றவியல் வழக்கிலிருந்து நீக்கி, சிகிச்சையையும் சமூக மறுசீரமைப்பையும் மையப்படுத்திய Public Health Approach (பொதுச் சுகாதார அணுகுமுறை) க்கு மாறியது. அதேவேளை 2016 இல் பிலிப்பீன்ஸ் முன்னெடுத்த கடுமையான போதைப்பொருள் யுத்தம், நீதிமன்றத்துக்கு வெளியிலான கொலைகள் குறித்த சர்வதேசக் கண்டனத்தைப் பெற்றது. இரண்டு எடுத்துக்காட்டுகளும் ஒரே உண்மையைச் சுட்டுகின்றன: கடுமையான அமுல்படுத்தல் உரிய சட்ட நடைமுறைக்கும் (Due Process) சிகிச்சைக் கட்டமைப்புக்கும் உட்பட்டு நடக்கும்போதே நீடித்த பலனைத் தரும். Martin Luther King Jr. குறிப்பிட்டது போல, “எங்கோ நடக்கும் அநீதி, எல்லா இடங்களிலும் உள்ள நீதிக்கு ஒரு அச்சுறுத்தல்.” சட்டத்தின் நியாயம் குறையும்போது, அதன் நம்பகத்தன்மையும் குறைகிறது.

இந்தச் சிக்கலின் மையத்தில் இருப்பவர்கள் இளைஞர்கள். பாடசாலை மாணவர்கள் பலர் போதைப்பொருள் தொடர்பாகக் கைதாகும் செய்திகள் கவலை தருபவை. கைப்பேசிகளும் சமூக ஊடகங்களும் வழியாக ஒண்லைனில் நடக்கும் விற்பனை, வீதிக்கு வராமலேயே பாடசாலை வலயத்துக்குள் ஊடுருவும் வலையாக மாறியிருக்கிறது. இளைஞர்களின் ஆற்றலே ஒரு நாட்டின் மிகப் பெரிய Demographic Dividend (மக்கள்தொகை ஆதாயம்). அந்த ஆதாயம் போதையால் அரிக்கப்படும்போது, அதன் விலை உற்பத்தித் திறனிலும் குடும்பங்களின் நிலைத்தன்மையிலும் தலைமுறைகளுக்கு நீடிக்கும். Nelson Mandela சொன்னது போல, “உலகை மாற்ற நீங்கள் பயன்படுத்தக்கூடிய மிகவும் வலிமையான ஆயுதம் கல்வி.” அந்த ஆயுதத்தை மழுங்கச் செய்யும் எதுவும் தேசிய நலனுக்கு எதிரானதே.

ஆகவே காவல்துறையால் மட்டும் இந்தப் போரை வெல்ல முடியாது. ஆசிரியர்கள், பெற்றோர், மதத் தலைவர்கள், பழைய மாணவர் சங்கங்கள், கிராம அபிவிருத்திச் சபைகள் ஆகியவற்றை உள்ளடக்கிய Community Policing (சமூகப் பங்களிப்புடனான காவல்) இதில் இன்றியமையாதது. வடக்கு, கிழக்கில் உள்ள கோவில் நிர்வாகங்களும் விளையாட்டுக் கழகங்களும் இளைஞர் அமைப்புகளும் நீண்டகாலமாகக் கட்டியெழுப்பிய சமூக நம்பிக்கையின் கட்டமைப்பைக் கொண்டுள்ளன. அவற்றைத் தகவல் பரிமாற்றத்துக்கும் தடுப்புக்கும் பயன்படுத்தும் ஒரு பாதுகாப்பான முறைமை, காவல்துறையின் வலையமைப்பைப் பல மடங்கு விரிவாக்கும்.

இரண்டாம் ஆண்டுக்கான முன்னுரிமைகளை வரையறுக்க இந்த அனுபவம் போதுமானது. சொத்து விசாரணைகள் கைதுகளின் வேகத்துக்கு இணையாக விரைவுபடுத்தப்பட வேண்டும். கைதுகளுக்குப் பதிலாகத் தண்டனைகளின் எண்ணிக்கையும் வழக்குகளின் முடிவு வீதமும் வெளிப்படையாகப் பகிரப்பட வேண்டும். புனர்வாழ்வு மையங்களின் இடவசதியும் தொழில்முறைத் திறனும் அதிகரிக்கப்பட வேண்டும். கடல் எல்லைக் கண்காணிப்பு தொழில்நுட்ப அடிப்படையில் வலுப்படுத்தப்பட வேண்டும். Kofi Annan கூறியது போல, “அறிவே சக்தி; தகவலே விடுதலை.” தரவுகளைத் தொடர்ந்து வெளிப்படுத்துவது அரசின் நம்பகத்தன்மைக்கு நன்மை பயக்கும்; அதேவேளை சுயாதீனமான மதிப்பீட்டுக்கும் வழிவகுக்கும்.

இந்த நடவடிக்கையின் வெற்றி, உண்மையில் ஒரு கேள்வியின் மூலம் அளக்கப்பட வேண்டும்: கைது செய்யப்பட்ட ஒரு கடத்தல்காரரின் இடத்தை நிரப்புவது இன்று எவ்வளவு கடினம்? பணம் முடக்கப்பட்டு, பாதுகாப்பு அகன்று, வழக்கு தொடர்ந்து நடக்கும் ஒரு சூழலில் வலையமைப்பின் மறு உருவாக்கம் கடினமாகும். அந்தக் கடினத்தன்மையே உண்மையான முன்னேற்றம். ஒவ்வொரு பாடசாலை வாசலிலும் அது எப்படி வெளிப்படுகிறது என்பதே அதன் இறுதிச் சோதனை.

ஆகவே, முதலாண்டின் புள்ளிவிவரங்கள் நம்பிக்கைக்கு ஓர் அடித்தளத்தை வழங்கியுள்ளன; ஆனால் அந்த அடித்தளத்தின்மீது கட்டப்பட வேண்டியவை இன்னும் பல. சொத்துக்களைப் பறிமுதல் செய்யும் துணிவு, அரசியல் பாதுகாப்பை அகற்றும் உறுதி, நீதிமுறைக்கு உட்பட்ட அமுல்படுத்தல், புனர்வாழ்வுக்கான முதலீடு, சமூகத்தின் பங்கேற்பு ஆகிய ஐந்தும் ஒன்றாக இணையும்போதே இந்தப் போராட்டம் ஒரு தற்காலிக நடவடிக்கையிலிருந்து நிலையான மீண்டெழு திறனாக (Resilience) மாறும். அதுவே, அடுத்த ஆண்டின் கணக்கு எழுதப்படும் போது, இந்த நாடு எதிர்பார்க்கும் முடிவாகவும் இருக்கும்.